Prefekti i Tiranës, Shkëlqim Hajdari, ndodhet në New York, me ftesë të komunitetit shqiptar atje, ku pritet të marrë pjesë në një miting madhështor në mbështetje të ish-krerëve të Ushtrisë Çlirimtare të Kosovës. Mitingu do të zhvillohet më 12 shtator, në orën 10:00, në Bronx, në rrugën “Gjergj Kastrioti Skënderbeu”, në të njëjtën ditë dhe orë kur tubime të ngjashme do të zhvillohen në Prishtinë dhe në qytete të tjera.
Tubimi organizohet në shenjë mbështetjeje për Hashim Thaçin, Kadri Veselin, Jakup Krasniqin dhe Rexhep Selimin, ndaj të cilëve vijon procesi gjyqësor në Dhomat e Specializuara të Kosovës në Hagë. Sipas organizatorëve, komuniteti shqiptar në New York synon që përmes këtij tubimi të shprehë solidaritetin dhe bindjen e tij për pafajësinë e ish-krerëve të UÇK-së.
Në këtë aktivitet pritet të marrin pjesë qytetarë shqiptarë nga New Yorku dhe zona të tjera të Shteteve të Bashkuara, ndërsa prania e Prefektit të Tiranës, Shkëlqim Hajdari, vjen si një tjetër dëshmi e lidhjeve të forta mes komunitetit shqiptar në diasporë dhe Shqipërisë. Tubimet e 12 shtatorit synojnë të përcjellin një mesazh të përbashkët solidariteti, në të njëjtën kohë, nga Prishtina, New Yorku dhe qytete të tjera ku jetojnë komunitete shqiptare.
