Situata e zjarreve në zonën e Daiasit dhe në kodrat përreth Tiranës ka qenë tejet kritike gjatë natës, me flakët që kanë përfshirë sipërfaqe të konsiderueshme me bimësi dhe janë përhapur me shpejtësi.
Në zonën Priskë-Gurrë, operacioni për përballimin e situatës është drejtuar nga afër nga Prefekti i Tiranës, Shkëlqim Hajdari, i cili ka qëndruar gjatë gjithë natës në terren, duke ndjekur nga afër ndërhyrjen dhe koordinimin e forcave të emergjencës.
Në terren kanë qenë të pranishëm edhe Haki Çako dhe ministri i Mbrojtjes, Ermal Nufi të cilët kanë ndjekur nga afër situatën dhe operacionin për vënien nën kontroll të flakëve.
Për shuarjen dhe izolimin e zjarrit janë angazhuar repartet zjarrfikëse të Tiranës dhe Kamzës. Për shkak të intensitetit dhe përmasave të zjarrit, janë kërkuar përforcime urgjente edhe nga Elbasani.
Gjatë gjithë natës, forcat operacionale kanë ndërhyrë në disa pika, me fokus kryesor izolimin e vatrave aktive dhe parandalimin e përhapjes së flakëve drejt zonave të banuara dhe sipërfaqeve të tjera me bimësi.
Prania në terren e drejtuesve të strukturave të emergjencës dhe autoriteteve qendrore ka synuar koordinimin e drejtpërdrejtë të operacionit, ndërsa ekipet zjarrfikëse kanë vijuar punën në kushte të vështira për shkak të terrenit dhe përhapjes së shpejtë të flakëve.
Video ekskluzive nga terreni