Kryeministri Edi Rama deklaroi se në janar të vitit që vjen do të aplikohet “paqja fiskale”. Në një takim me komunitetin e biznesit, kreu i qeverisë shqiptare theksoi se me këtë paketë të re synohet garantimi i një kuadri më të drejtë fiskal për procesin e integrimit europian.
“Me paketën fiskale 2026 nuk rrisim taksat, por synojmë të garantojmë një kuadër më të drejtë fiskal dhe të përgatisim sipërmarrjen për procesin e integrimit europian. Mbajmë premtimin për zero taksa për biznesin e vogël deri në vitin 2029.
Paqja fiskale është një zotim i yni i fushatës elektorale dhe sot është ligj. Pavarësisht disa debateve që nuk e adresuan dot thelbin e kësaj nisme, ne sot jemi në kushtet ku duke filluar nga janari i vitit të ardhshëm mund ta zbatojmë këtë nismë. Kjo është për të ndërtuar një urë të re besimi mes administratës tatimore dhe sipërmarrjes. Nuk është shpikje e jona. Është një instrument i përdorur me mijëra vjet tani më. Është një instrument për t’i dhënë mundësi sipërmarrjeve që nuk janë në konflikt me ligjin dhe që figurojnë në regjistrat e shtetit si kontributorë legjitimë që të rishikojnë pasqyrat e tyre fiskale. Ky rishikim jep u mundësi sipërmarrjeve të vetëkorrigjohen, duke ribërë deklarime të viteve të shkuara dhe duke pasur si motivim një tatim shumë më të ulët mbi fitimin”, Rama.
