Rama intervistohet nga ambasadori italian në Berlin: Më shumë shpejtësi për në BE dhe më pak pengesa burokratike

Në Berlin është zhvilluar një mbrëmje kulturore e veçantë ku kryeministri Edi Rama prezantoi 13 vizatime në ambientet e Ambasadës së Italisë në kuadër të ekspozitës personale “Chrysalizing”, e cila po mbahet në Société Gallery.

Gjatë aktivitetit, ambasadori italian në Berlin, Fabrizio Bucci, zhvilloi një bisedë me të në një format joformal që ndërthurte artin, kujtimet personale dhe politikën. Në një intervistë për ANSA, Rama foli me ironi për veten si “artisti më i mirë mes kryeministrave dhe kryeministri më i mirë mes artistëve”, duke rikujtuar edhe të kaluarën e tij si pedagog dhe sportist.

Në fokus të diskutimit u vendos edhe Bashkimi Evropian. Rama e cilësoi BE-në si një “proces të domosdoshëm dhe funksional, por kompleks”, duke theksuar se pas luftës në Ukrainë është ndryshuar qasja ndaj vendeve jashtë unionit. Ai kritikoi megjithatë ritmin e ngadaltë të procesit të integrimit, duke kërkuar më shumë shpejtësi dhe më pak burokraci. Eventi u zhvillua në kuadër të “Gallery Weekend Berlin”, me mbështetjen e ambasadës italiane dhe Société Gallery.