Kryeministri Edi Rama është shprehur se investimi prej 4 miliardë dollarësh, që pritet të realizohet në Zvërnec të Vlorës, do të jetë një bekim i madh për të gjithë ekonominë shqiptare. Kreu i qeverisë tha se një vend transformohet vetëm nga ëndrrat e mëdha dhe jo nga udhëheqës që sipas tij bëjnë thirrje për nacionalizëm.
“Natyrisht që njerëzit e thjeshtë nuk mund të hyjnë në resorte luksoze apo në jahte, por është jahti ai që hyn në ekonominë e tyre. Imagjinoni, ‘Porto Montenegro’ ka qenë një investim prej 150 milionë eurosh dhe më pas u shit për mbi 700 milionë euro. Tani flasim për një investim prej 4 miliardë dollarësh në Zvërnec të Vlorës. Merreni me mend vetë se çfarë do të prodhojë ai.
Ky investim do të jetë një bekim për ekonominë e gjithë Shqipërisë. Ai nuk do të sjellë vetëm kapital dhe nuk do të ndërtojë vetëm vila e hotele, por do të krijojë një vlerë të shumëfishuar në të gjithë komponentët ekonomikë, edhe përtej kufijve të tij. Pikërisht kjo është ajo që e transformon në themel ekonominë, e jo ëndrrat e varfra.
Vendet ngecin jo kur kanë varfëri në lekë, por kur kanë varfëri në ëndrra. Popujt ngecin kur udhëhiqen nga njerëz të varfër në ëndrra dhe të pangopur në interesat e tyre. Ata ngecin kur udhëhiqen nga sharlatanë dhe delirantë, të cilët u thonë qytetarëve: ‘Ky vend është vetëm i juaji’. Kështu u thoshte edhe Hitleri gjermanëve.
Kjo do të thotë t’u bësh thirrje instinkteve më të errëta të racizmit dhe vetëizolimit, duke i shtyrë njerëzit drejt humnerës. Në histori, popujt nuk kanë përfituar kurrë nga udhëheqës që përqafojnë sharlatanizma të tilla. Shqipëria ka nevojë për respekt, si për zërin e hoxhës, ashtu edhe për zërin e priftit”, tha ndër të tjera Rama.