Kryeministri Edi Rama zhvilloi një takim me ekspertët e AKSHI-t, të cilët janë angazhuar në zhvillimin dhe konfigurimin e platformës së re “Pasqyrë Albania”, për të prezantuar funksionalitetet dhe risitë e saj.
Sipas kreut të qeverisë, platforma është ndërtuar mbi katër shtylla kryesore, të cilat synojnë të rrisin transparencën dhe të lehtësojnë komunikimin mes qytetarëve dhe institucioneve shtetërore.
Përmes saj, qytetarët do të mund të ndjekin investimet publike dhe ecurinë e projekteve në zonat ku jetojnë, të informohen mbi vendimet e bashkive dhe këshillave bashkiakë, si dhe të kontrollojnë në kohë reale statusin e aplikimeve, shërbimeve dhe ankesave të tyre. Një tjetër funksionalitet do të jetë mundësia për të dhënë mendime dhe sugjerime mbi projektaktet që janë në proces konsultimi publik.
Gjatë prezantimit, Rama u shpreh se projekti është një prej nismave të ndërmarra pas protestave të zhvilluara në fillim të qershorit, të njohura si protestat e flamingove. Sipas tij, platforma synon të përmirësojë marrëdhënien mes qytetarit dhe shtetit, duke adresuar një nga problematikat kryesore të administratës, humbjen e kërkesave dhe ankesave në proceset burokratike.
Kryeministri theksoi se “Pasqyrë Albania” do të mundësojë që i gjithë shteti të jetë i aksesueshëm nga qytetarët përmes një dritareje të vetme dhe vetëm me një klikim, duke u ofruar atyre më shumë informacion dhe mundësi për të ndjekur veprimtarinë e institucioneve.