Kryeministri Edi Rama zhvilloi një takim me ekspertët e Agjencisë Kombëtare të Shoqërisë së Informacionit (AKSHI), të angazhuar në konfigurimin e platformës së re “Pasqyrë Albania”, ku u njoh nga afër me funksionalitetet dhe risitë e saj.
Gjatë prezantimit, Rama bëri të ditur se platforma do të jetë e aksesueshme si nga kompjuteri, ashtu edhe nga telefoni, përmes një faqeje interneti dhe aplikacioni për sistemet Android dhe iOS.
Një nga risitë kryesore të saj do të jetë mundësia e komunikimit të drejtpërdrejtë të qytetarëve me institucionet shtetërore. Sipas ekspertëve të AKSHI-t, në ditët në vijim do të krijohet një hapësirë ku qytetarët mund të drejtojnë kërkesat e tyre pranë institucioneve përkatëse dhe të marrin përgjigje në kohë reale. Përmes këtij sistemi do të mund të ndiqet edhe ecuria e kërkesave dhe ankesave.
Platforma do të përmbledhë faqet zyrtare të ministrive dhe institucioneve, ndërsa brenda saj do të jetë e integruar edhe e-Albania. Rama theksoi se synimi është thjeshtimi i marrëdhënies mes qytetarëve dhe administratës, duke mundësuar akses më të shpejtë në informacion dhe më shumë transparencë.
Një tjetër element i rëndësishëm është integrimi gradual i inteligjencës artificiale. Kreu i qeverisë shpjegoi se sistemi do të trajnojë agjentë të inteligjencës artificiale, të cilët në të ardhmen pritet të kryejnë ndërveprime dhe të trajtojnë kërkesat e qytetarëve me më pak ndërhyrje njerëzore.
Në përfundim, Rama e cilësoi “Pasqyrë Albania” si një prej rezultateve të reflektimit mbi protestën e flamingove, të zhvilluar në fillim të muajit qershor. Ai e ndau këtë projekt nga çështjet e tjera politike, duke deklaruar se nuk dëshironte që ato të përziheshin me prezantimin e platformës.