Kryeministri Edi Rama ka reaguar në platformën X lidhur me protestën e dhunshme në Tiranë dhe plagosjen në sy të 28-vjeçarit nga Elbasani, Erjon Vishkulli, i cili është nisur drejt Italisë për trajtim të specializuar.
Në reagimin e tij, Rama dënon aktet e dhunshme dhe akuzon nxitësit e protestës se po përdorin demonstruesit për përplasje. Ai shprehet se plagosja e të riut duhet të shërbejë si një sinjal alarmi për pasojat që mund të sjellë dhuna gjatë protestave.
Kryeministri thekson gjithashtu se është angazhuar personalisht për sigurimin e trajtimit të 28-vjeçarit në një spital të specializuar në Itali, si edhe për transportimin e tij me avion mjekësor.
Rama shprehet se i vjen keq për çdo person që lëndohet, pavarësisht rolit të tij në protestë, por shton se në situata të dhunshme rreziku për dëmtime bëhet më i madh.
Ai akuzon më tej organizatorët dhe mbështetësit e protestave se po e përdorin politikisht plagosjen e të riut për të nxitur tensione të tjera.
Në fund të reagimit, Rama paralajmëron se përgjegjësit për dhunën do të përballen me pasojat dhe shprehet se qytetarët shqiptarë nuk do t’i harrojnë apo falin aktet e dhunshme dhe shkatërrimet.