Kryeministri Edi Rama ka folur sërish lidhur me debatin për investimin në Zvërnec dhe në Konferencën Kombëtare për Arsimin dhe Formimin Profesional.
Ndër të tjera, kreu i qeverisë u shpreh se nuk ka asnjë provë që investimet ndërkombëtare të kenë shkatërruar natyrën, duke iu përgjigjur kështu dhe protestave apo qytetarëve që kërkojnë anulimin e këtij projekti.
“Ideja që investitorët e huaj vijnë në Shqipëri për të ndërtuar resorte, të cilat janë për shumë të pasur dhe për punonjës nga Pakistani, Bangladeshi apo Filipinet, sepse duan t’i paguajnë pak, është një ide që nuk ka asnjë lidhje me realitetin. Është gabim i madh që të flitet në këtë mënyrë dhe është gënjeshtër e madhe që të mendohet kështu.
Ne nuk kemi një numër të madh investitorësh të huaj. Vetëm kohët e fundit ka filluar të shfaqet një interes në rritje nga kapitali dhe sipërmarrja e huaj për Shqipërinë, i lidhur ngushtë me suksesin e vendit në turizëm. Deri para disa vitesh, nuk kishte pothuajse asnjë interes nga kapitali i huaj. Shqipëria ishte po aq e bukur sa është sot dhe natyra e saj po aq tërheqëse. Interesi i parë i rëndësishëm, që më pas u materializua në investim konkret, ishte ai për Portin e Durrësit. Pas këtij investimi filloi të rritej interesi i kapitalit dhe i sipërmarrjes së huaj, pasi më parë mungonte besimi.
Ideja se kapitali i madh dhe sipërmarrjet e mëdha shkojnë në vende të caktuara për të investuar në turizëm me qëllim shkatërrimin e tyre ose shfrytëzimin e krahut të lirë të punës është një ide që buron nga padija. Nuk ka prova që kapitali i huaj dhe sipërmarrjet prestigjioze të kenë luajtur rol në shkatërrimin e natyrës apo të kenë qenë shkaktarët kryesorë të dëmeve të shkaktuara ndaj mjedisit.
Dëmet mjedisore kanë ardhur, para së gjithash, si pasojë e fazave të zhvillimit që janë kushtëzuar jo vetëm nga mungesa e kapitalit, por edhe nga një vizion i kufizuar për shumë prej çështjeve komplekse të kësaj fushe. Natyrisht, ato janë ndikuar edhe nga kostot e ndërtimit dhe niveli i çmimeve.
Nëse shohim sot bregdetin shqiptar, vërejmë se zhvillimi i tij nisi në Golem. Sot është e paimagjinueshme që një sipërmarrës t’u paraqitet autoriteteve me një projekt të ngjashëm, pasi ai model zhvillimi konsiderohet plotësisht i papranueshëm. Megjithatë, ai lidhej me një periudhë kur mundësitë ishin të kufizuara, kapitali ishte modest, njohuritë më të pakta dhe, mbi të gjitha, fuqia blerëse ishte shumë më e ulët.
Pavarësisht mangësive, situata ka ardhur duke u përmirësuar. Sot problemi kryesor i industrisë nuk është niveli i pagave. Pyetja nuk është sa duhet të paguhen punonjësit, por ku mund të gjenden punonjësit e duhur për çdo nivel të industrisë dhe si mund të sigurohen aftësitë profesionale të nevojshme për ta kryer punën me cilësi”, tha Rama.