Kryetari i Bashkisë së Maliqit, Gëzim Topçiu flet për projektin e reformës së re territoriale, që parashikon bashkimin e Bashkisë së Maliqit me atë të Korçës. Topçiu tha se ende nuk është e qartë se çfarë do të sjellë konkretisht reforma, veçanërisht për statusin e qyteteve, kompetencat, financat dhe investimet. ”Ende unë jam i paqartë për atë çfarë do të ndodhë në kuptimin çfarë do të ndryshojë në qoftë se do të miratohet kjo reformë e re, cila do të jetë statusi i qyteteve tona, i bashkive tona, i kompetencave, i financave, i investimeve. Problematikat janë të gjera edhe pavarësisht kësaj, kjo nuk mund të thuhet me një po e me një jo’‘,-tha për mediat.
Ai theksoi se reforma kërkon më shumë se një ndryshim ligjor dhe se duhet të përcaktohen qartë kompetencat dhe financat e njësive vendore. ”Pasi që kjo reformë nuk kërkon vetëm një ndryshim ligjor për efekt të asaj çfarë fola me këtë projektligj i cili ka shkuar në parlament, por kërkon ndryshime të tjera ligjore në ligjin e pushtetit vendor, financat vendore, në kompetencat që duhet të kenë qytetet”.
Topçiu bëri të ditur se po përgatit një material që do t’i dërgohet Kuvendit të Shqipërisë, ku do të paraqesë qëndrimin e tij për reformën. ”Pasi flitet për 15 qytete dhe nuk janë pak, e midis tyre Maliqi edhe Divjaka janë dy qytete goxha me peshë, me popullsi të konsiderueshme, që vetëm me censusin e fundit Maliqi ka rreth 31 mijë banorë nga 65 mijë e kusur që ka në gjendjen civile. […] Nuk është kaq e thjeshtë”.
Kryebashkiaku sqaroi gjithashtu se projektligji parashikon bashkim, dhe jo shkrirje të drejtpërdrejtë të strukturave të Maliqit. ”Projektligji i propozuar pra parashikon që Bashkia Maliq të bashkohet me Bashkinë Korçë, dhe organizimi i brendshëm propozohet të kalojë nga bashki në njësi administrative që jemi sot, në bashki, qytet dhe njësi administrative”.
Sipas tij, njësitë administrative të Maliqit do të vijonin të vareshin nga Maliqi, ndërsa posti i kryetarit të bashkisë do të zëvendësohej me një zëvendëskryetar funksional. Në fund, Topçiu tha se debati nuk duhet të lidhet me ruajtjen e posteve, por me shërbimet që do të marrin qytetarët. “Për mua nuk duhet parë bashkia, pozicioni, ky organizim si një moment që duhet të qajmë hallin e një kryetari bashkie. Por unë mendoj që duhet të shikojmë sa shërbimet ndaj njerëzve venë më afër, sa u zgjidhen më lehtë, sa Maliqi do të ecë jo me këtë ritëm që ka ecur tani po do të ecë më mirë, sa investime do të marrim më shumë, sa do t’u shërbejë qytetarëve. Domethënë koncepti është shumë i gjerë”, përfundoi ai.