Gjatë “Foltores së Ripërtëritjes” në Vlorë, kreu i Partisë Demokratike, Sali Berisha, ka komentuar zhvillimet e fundit që lidhen me hetimet ndaj disa zyrtarëve dhe ish-zyrtarëve të lartë, duke drejtuar akuza të forta ndaj kryeministrit Edi Rama. Berisha u ndal te drejtuesja e SHISH, Vlora Hyseni, ndaj së cilës GJKKO ka caktuar masën e sigurisë “arrest në shtëpi” dhe masën e pezullimit nga detyra, në kuadër të një hetimi të lidhur me dosjen e AKSHI-t.
Duke iu referuar hetimeve, Berisha e akuzoi Hysenin se kishte bashkëpunuar me eksponentë të krimit të organizuar dhe se u kishte vënë në dispozicion mjete shtetërore të survejimit. “Kreu i SHISH është ushtare e shpifur e krimit të organizuar. I jepte krimit gjithë mjetet që bliheshin me taksat tuaja, për survejim”, deklaroi Berisha.
Kreu i PD-së komentoi gjithashtu kontrollin e banesës së ish-drejtorit të Përgjithshëm të Policisë së Shtetit, Ilir Proda, nga BKH, me urdhër të GJKKO-së. Sipas të dhënave të bëra publike, gjatë kontrollit janë sekuestruar një telefon, një laptop, si dhe disa USB dhe CD. Deri në këtë fazë, SPAK nuk ka bërë publik rolin konkret që Proda dyshohet se ka në hetim.
Berisha bëri një pretendim të veçantë lidhur me kontrollin, duke deklaruar se në banesën e ish-drejtorit të Policisë është gjetur edhe një armë snajper. “Ish-drejtori i policisë që iu kontrollua banesa, iu gjet super snajper në banesë, i blerë për funksione të caktuara”, tha ai. Në fjalën e tij, Berisha përmendi edhe emrat e Belinda Ballukut, Ergys Agasit dhe Ermal Beqirit. Ai pretendoi se veprimet për të cilat këta persona janë hetuar apo për të cilat janë ngritur akuza publike nuk kanë qenë të pavarura, por janë kryer sipas urdhrave të kryeministrit Rama.
“Çdo gjë që keni dëgjuar e do dëgjoni për Ballukun, Hysenin, Beqirin, Agasin, në mënyrë absolute të gjitha janë bërë nën urdhrat e Ramës”, tha Berisha. Në përfundim të fjalës së tij, kreu i demokratëve paralajmëroi se, sipas tij, priten të dalin të tjera të dhëna nga këto zhvillime. “Shqiptarët do të dëgjojnë shumë gjëra të tjera. PD ka rolin të shpëtojë vendin”, deklaroi Berisha.