Një studiuese e vlerësuar e Universitetit të Kembrixhit ka humbur jetën në një aksident tragjik hekurudhor në Spanjë, ndërsa ishte rrugës për të marrë një çmim për ekselencë shkencore. Dr. Marta Shahbazi po udhëtonte drejt një ceremonie çmimesh të mërkurën kur treni me të cilin ajo ndodhej u përplas me një tjetër pranë Urda-s, në jug të Madridit, duke shkaktuar vdekjen e 69 personave.
Nëna e dy fëmijëve ishte një profesoreshë e asociuar dhe drejtonte një grup studiuesish në Laboratorin MRC të Biologjisë Molekulare (LMB) në Kembrixh. Ajo kishte fituar disa çmime për punën e saj mbi embrionet njerëzore dhe biologjinë qelizore. Shahbazi ishte shpallur fituese e një çmimi nga Shoqëria Spanjolle për Biologjinë Zhvillimore për kontributet e saj në studimin e zhvillimit të hershëm njerëzor dhe pritej ta merrte çmimin në një konferencë në El Rompido, Andaluzi.
Në një deklaratë, LMB i bëri homazhe “shkencëtares frymëzuese, të talentuar dhe pasionante” dhe e përshkroi vdekjen e saj si një “tronditje të thellë dhe një humbje të madhe”. Instituti theksoi se Marta, si bashkëshorte dhe nënë e dy fëmijëve të vegjël, kishte shkruar me elokuencë për balancimin e familjes dhe karrierës, duke shërbyer si një model shumë i admiruar për një “shkencëtare-nënë”, term që ajo e përdorte për të përshkruar veten. Hulumtimet e saj kishin hedhur dritë mbi hapat më të hershëm në zhvillimin e embrioneve njerëzore dhe si ndodhin gabimet që çojnë në dështime të shtatzënive.
Dr. Shahbazi kishte kryer doktoraturën e saj në Qendrën Kombëtare Spanjolle të Kërkimit të Kancerit, përpara se t’i bashkohej Universitetit të Kembrixhit si studiuese post-doktorale dhe më pas LMB-së në vitin 2020. Lajmi për vdekjen e saj u konfirmua fillimisht në një postim në rrjetet sociale nga CiMUS, me qendër në Santiago de Compostela, ku punon tezja e Dr. Shahbazi.
Aksidenti në Spanjë ndodhi kur një tren shtetëror me shpejtësi të lartë i kompanisë Renfe u përplas me pjesën e pasme të një treni të ndalur të operuar nga kompania Iryo. Ky është një nga fatkeqësitë hekurudhore më të rënda në historinë moderne të Evropës dhe aksidenti më i keq i Spanjës që nga viti 2013. Në vend u shpallën tre ditë zie kombëtare. Më shumë se 540 persona ndodheshin në bord të të dy trenave.
Marrë nga BBC News