Një protestuese në Bulevardin “Dëshmorët e Kombit” ka përcjellë një mesazh të drejtpërdrejtë për kreun e Partisë Demokratike, Sali Berisha, duke i kërkuar të largohet nga politika dhe t’i hapë rrugë një brezi të ri. “Kam qenë 6 vjeç kur ka dalë në mitingun e parë të demokracisë në vitin 1991. Kam qenë në 1997 atje kur u bë qeveria teknike, me shpresën se u bashkuam prapë, dhe tani prapë këtu”, u shpreh protestuesja.
Në vijim, ajo iu drejtua Berishës me një thirrje të ashpër, duke i kërkuar të tërhiqet nga jeta politike dhe të shijojë pensionin pranë familjes. Sipas saj, largimi i tij do të ishte një shembull konkret i përgjegjësisë politike. “I them Sali Berishës: shko merr pensionin, gëzo ata fëmijë, nipër e stërnipër. Gëzo jetën e pensionit, boll!”, deklaroi ajo.
Protestuesja e zgjeroi kritikën edhe ndaj kryeministrit, duke e vënë theksin te dorëheqja si një akt që, sipas saj, duhet të shërbejë si shembull për klasën politike. “Thuaji Edi Ramës si jepet dorëheqja! Jep dorëheqjen dhe boll dole të flasësh”, u shpreh ajo, përpara se ta mbyllte mesazhin me një tjetër apel të drejtpërdrejtë ndaj kreut të opozitës. “Jepe shembullin, dil në pension dhe jepi vetes dinjitet”, përfundoi protestuesja.
