Takimi me ekspertët e financave, Rama: Për prioritetet tona kryesore në rrugën e Shqipërisë 2030 në BE

Këtë të premte kryeministri Edi Rama zhvilloi një takim me ekspertët e financave, ku në një postim në Facebook, shkruan se në tryezë u diskutuan mbi prioritetet e qeverisë në rrugën e Shqipërisë drejt BE-së.

”Është shumë e rëndësishme që “Paqja Fiskale” të hartohet dhe të përmbyllet me sukses në aspektin konceptual deri në fund të këtij viti në mënyrë që vitin e ardhshëm të fillojmë me zbatimin e saj. Unë kam shumë besim që nëse “Paqja Fiskale” konceptohet dhe planifikohet ashtu siç duhet, do të jetë një mesazh shumë pozitiv për sipërmarrjen, por besoj do të mund të rrisë edhe të ardhurat për arkën e buxhetit të shtetit, ndërkohë që pika kyçe mbetet rritja e performancës në tërësi dhe ulja e informalitetit”,-tha Rama.

Nga ana tjetër, siç dëgjohet në video, ministri i Financave, Petrit Malaj tha se ”Qëllimi ynë është i qartë dhe ambicioz. Përmes kombinimit të politikave të shëndosha fiskale dhe monetare, reformave strukturore të thella dhe investimeve strategjike, ekonomia shqiptare do të garantojë një trajektore të re zhvillimi të qëndrueshëm ekonomik”.