200-vjetori i lindjes së Charlotte Brontë do të shënohet me ekspozitë

Në “Jane Eyre” të Charlotte Brontë, Jane i thotë Rochesterit: “Nuk jam zog dhe s’më kap asnjë rrjetë. Jam qenie e lirë njerëzore me vullnet të lirë, prandaj do të largohem prej jush”.

Dorëshkrimi origjinal i Brontë, i vitit 1847 do të hapet pikërisht në këtë faqe, në “Morgan Library &Museum”, duke nisur nga 9 shtatori.

Dokumenti do të jetë pjesë e ekspozitës që do të hapet për nder të 200-vjetorit të lindjes së Brontë, që është një bashkëpunim me “Brontë Parsonage Museum” në Haworth të Anglisë dhe që ka për qëllim të jetë ekspozita më e madhe për Brontë, e prezantuar ndonjëherë në New York.

Ekspozita me titull “Charlotte Brontë: An Independent Will” do të përfshijë dorëshkrime letrare, letra dhe libra të rrallë të shtypur nga koleksioni i muzeut “Morgan”, sikurse edhe artefakte personale, vizatime dhe fotografi të ruajtura nga muzeu britanik.