Peter Tase – Personalitet kulturor, studiues, botues e përkthyes i shquar shqiptar në botë

Prof. Lisen Bashkurti-

E kam njohur fillimisht emrin Peter Tase nga shkrimet e shumta në fushën e letërsisë shqipe, të përkthimeve shumë cilësore në anglisht dhe spanjisht, nga analizat e thella të marrëdhënieve ndërkombëtare dhe të veprimtarive diplomatike. Më pas, ishte pikërisht interesimi i tij që na lidhi së bashku në botime të shumta deri tek botimi i librit tim të dytë në ShBA, “Crumble bridges of the Balkans”, përgatitur për botim dhe redaktuar nga Peter Tase.

Peter Tase është një intelektual i spikatur me origjinë nga Berati. Familja e tij është qytetare, e kulturuar, e thjeshtë dhe shumë atdhetare. Vitet e rinisë së hershme Peter i nisi në ShBA bashkë me familjen. Atje Peter u formua si intelektual me edukim, kualifikim, trajnime dhe aftësim shumëdisiplinor. I pa shkëputur asnjëherë nga Shqipëria, Peter arriti, nga të pakët moshatarë të tij emigrantë, të ankorohej shumë shpejt në elitën intelektuale Amerikane të kohës, duke vendosur ura lidhje midis Shqipërisë dhe personaliteteve të saj me ShBA, median dhe personalitete të shquara Amerikane.

Peter Tase është kontributor i promovimit të imazhit të Shqipërisë në botë. Ai ka bërë artikuj, analiza, opinione mjaft interesante, vlera e të cilave ka tejkaluar kufijtë e Shqipërisë dhe ShBA dhe është njohur dhe botuar edhe në Amerikën Latine, në Evropë dhe në Azi. Në mënyrë të vecantë, Peter Tase ka promovuar përmes përkthimeve brilante letërsinë shqipe në dy gjuhë, në anglisht dhe spanjisht, duke bërë të njohur vlerat bashkëkohore të saj në hapsira ku ajo ka munguar. Në promovimin e letërsise Shqipe në gjuhën Anglese dhe atë Spanjolle, Peter Tase po jep një kontribut të shquar. Ai gjithashtu promovon vazhdimisht vlerat e kulturës shqiptare në Amerikën e Veriut dhe të Jugut.

Petër Tase ka një kontribut aktiv dhe profesional në fushën e marrëdhënieve ndërkombëtare dhe diplomacisë publike. Në fushën e marrëdhënieve ndërkombëtare dhe diplomatike, Peter Tase ka pasur dhe ka edhe aktivitet konkret. Ai ka qënë përfaqësuesi diplomatik i Kosovës në Amerikën e Jugut me qëndër në Paraguay (2017-2018), si dhe funksionar i Korpusit të Paqjes (US Peace Corps) në Paraguay për rreth dy vjet e gjysëm (Shkurt 2007 – Qershor, 2009).

Në fushën e marrëdhënieve ndërkombëtare dhe diplomacisë pena e Peter Tase është shumë e njohur dhe e respektuar, sidomos në hapsirat gjeopolitike të rajonit Pan-Amerikan, në ato të Asizë Qëndrore, të Euro-Atlantizmit, të marrëdhënieve Ballkanike. Këto janë hapsirat gjeopolitike ku më së shumti spikatë në mënyrë të vecantë pena e mprehtë e Peter Tase. Rrjete sociale dhe portale prestigjioze si ‘Foreign Policy News’, ‘EuroAsia Review’, ‘Viajes y Lugares’, ’Report.az”, “edn.news.net’,’Siglo XXI”, ‘AzerForum.com’, El independiente’, “vestikavkaza.ru’ etj., e kanë shumë të pranishëm krijimtarinë e Peter Tase në fushën e marrëdhënieve ndërkombëtare, ku opinionet, analizat e studimet e tij, spikatin për zhvillimet në Amerikën Latine, Azinë Qëndrore, Ballkanin Perëndimorë.

Natyrisht, Shqipëria e ditëve të sotme tërheq vëmendjen e vazhdueshme të autorit Peter Tase. Pa hequr dorë asnjë moment nga promovimi i Shqipërisë, arritjeve dhe vlerave të saj identitare e kulturore, Peter Tase hedh shikimin e tij kritik, ngadonjëherë shumë kritik, lidhur me zhvillimet e fundit në Shqipëri. Në fokusin e tij janë problemet e demokracisë dhe keq qeverisjes në Shqpërinë e sotme, të korrupsionit të lartë, të mungesës së shtetit ligjor, të shkeljes së drejtave të njeriut dhe inkriminimit në trafiqet e drogave ndërkombëtare. Në këto aspekte, Peter Tase ka qënë ndër zërat më kritik të Qeverisë Rama dhe enturazhit të oligarkëve të saj, që kanë dëmtuar rëndë imazhin bashkëkohor të Shqipërisë dhe procesin e democracisë, zhvillimit dhe integrimit të saj në Bashkimin Evropian.

Peter Tase është autori i shumë librave me vlera të vecanta, sic është Fjalori Simultan me Pese Gjuhe, Shqip, Anglisht, Spanjisht, Guaranisht dhe Italisht, një vepër shumë e rëndësishme, me vlera të larta profesionale dhe praktike. Gjithashtu, Peter Tase ka botuar një numër të madh librash origjinalë të tij, sikundër edhe shumë botime të autorëve nga Shqipëria, Kosova e vënde të tjera.

Së fundi, duhet theksuar se Peter Tase është një nga përkthyesit më të mirë të botimeve shqiptare në Anglisht dhe Spanjisht. E them me bindje se pa penën e tij si përkthyes, shumë botime të autorëve shqiptarë, klasik dhe bashkëokohor, sikundër edhe shumë botime publicistike, akademike, shkencore, diplomatike nga Shqipëria, Kosova, Maqedonia e Veriut e treva të tjera shqiptare nuk do e kishin parë dritën e botimit në hapsirat kuturore anglisht folëse dhe spanjisht folëse. Për këtë Peter Tase meriton vlerësimin më të lartë.