30-vjetori i partneritetit USAID-Shqipëri, Presidenti Begaj: Kanë mbështetur demokratizimin e vendit

Në ambientet e Ambasadës së SHBA-së në Tiranë, këtë të enjte u mbaj një ceremoni për të festuar 30 vjetorin e partneritetit midis USAID-it dhe Shqipërisë, ku presidenti Bajram Begaj thotë se i ka akorduar titullin ”Kalorës i Urdhrit të Flamurit”. Përmes një postimi në facebook, Begaj nënvizon edhe se nga ky partneritet është mbrojtur demokratizimi i vendit.

”Kënaqësi pjesëmarrja sot në kremtimin e 30-vjetorit të partneritetit mes USAID-it dhe Shqipërisë, një bashkëpunim që ka prekur shumë fusha duke zhvilluar kapacitetet, duke sjellë praktikat më të mira ndërkombëtare e duke mbështetur demokratizimin e vendit.

Shpreha mirënjohjen për Zyrën e USAID-it në Shqipëri duke i akorduar titullin “Kalorës i Urdhrit të Flamurit” me motivacionin “Për kontributin e vyer përmes programeve në shërbim të shtetit, kombit dhe qytetarëve, për konsolidimin e institucioneve demokratike, nxitjen e zhvillimit ekonomik dhe mirëqeverisjen””,-shkruan Begaj.