Avokatët në Vlorë përshkallëzojnë protestën kundër hartës së re gjyqësore: Do bojkotojmë edhe masat e sigurisë

Avokatët në Vlorë paralajmërojnë se do të vijojnë bojkotin e seancave gjyqësore e do të sabotojnë edhe masat e sigurisë në gjykata.

Përmes një deklarate shpërndarë për mediat, kreu i Dhomës Durim Barjamaj, tha se bojkoti në shenjë proteste kundër hartës së re gjyqësore do të vijojë dhe javën e ardhshme dhe ata nuk do marrin pjesë as në shqyrtimin e masave të sigurisë personale.

Por kjo do ta fusë krejt procesin gjyqësor në kolaps.

“Sot në Vlorë në një mbledhje të jashtëzakonshme Dhoma Vendore e Avokatisë në Vlorë u mblodh për të shprehur qëndrimin e saj lidhur me bojkotin e Dhomës së Avokatisë Shqiptare dhe doli me vendimin në mënyrë unanime që: të vazhdojë bojkotin e të gjitha seancave gjyqësore edhe për javën tjetër.

Gjithashtu Dhoma Vendore e Avokatisë Vlorë do të bojkotojë vec seancave gjyqësore edhe të gjitha masat e sigurisë personale.”

Avokatët në Vlorë thonë se këtij vendimi i është bashkuar edhe Dhoma e Avokatisë Shkodër.

Vendimi i KLGJ mbështetur apo inicuar nga ministria e drejtësisë për të ndryshuar hartën gjyqësore të Shqipërisë ka krijuar përplasje të madhe mes qeverisë nga njëra anë dhe avokatëve dhe qytetarëve, nga ana tjetër.