Berisha mbron Jorida Tabakun: Ajo bëri një fushatë intensive. Le të hapen kutitë e Tiranës

Sali Berisha gjatë konferencës për shtyp këtë të hënë, u pyet për akuzat e Adriana Kalasë në drejtim të Jorida Tabakut. Kalaja akuzoi Tabakun se asaj “ja bleu votat Rama dhe oligarkët, për të poshtëruar Berishën. Ai tha se Kalaja ka folur pa fakte, kurse për Tabakun u shpreh se ajo ka bërë një fushatë intensive.

Berisha tha se ai është kundër sulmeve pa fakte dhe se i qëndron parimit “të hapen kutitë” për të faktuar shkeljet nëse ka (në zgjedhjet e 2009 ishte kundër hapjes së kutive kur i kërkonte PS-ja). 17-18 mijë vota janë cilësuar nga KQZ-ja si të pavlefshme në qarkun Tiranë.

”Zonja Adriana Kalaja është luftëtare e vendosur. Zonja Kalaja dhe kushdo tjetër, nuk ka të drejtë pa fakte të akuzojë ndonjë njeri. Unë vetë kam thënë se Jorida Tabaku ka bërë një fushatë intensive. Nëse Edi Rama për Olta Xhaçkën, urdhëroi që asnjë kuti mos hapet, unë nuk e kam bërë kurrë këtë dhe çdo kandidat që ka dyshime se i janë bërë padrejtësi, e ftoj të marrë dokumentacionin dhe ta vërtetojë. Ne nuk jemi parti që themi, mos të hapen kutitë. Parimi ynë është që të kërkosh të drejtën tënde”,-tha Berisha.

Ditën e dielë, përfaqësuesi ligjor i Partisë Demokratike në KQZ, Franci Nuri tha se kërkesa për rinumërim do të fokusohet tek rivlerësimi i fletëve të pavlefshme të votimit. ”Rezultati është mjaft i ngushtë në lidhje me mandatin e 14-të. Mandati është diskutim mes Partisë Demokratike Aleancës për Shqipërinë Madhështore dhe partisë së z. Agron Shehaj. Fletët e pavlefshme janë një opsion, nuk mund te anashkalohen, pasi janë rreth 17-18 mijë fletë votimi te pavlefshme në gjithë qarkun e Tiranës dhe patjetër qe duhet te jene pjese e shqyrtimit dhe vlerësimit ne gjykimin tonë”.