Braçe shpërthen si “tifoz” ndaj adashit Veliaj: O Erjon, duam të luajmë në Tiranë

Çështja e stadiumit ka qenë një pengesë e madhe këtë sezon për Partizanin, por sidomos për tifozët e kuq të cilët nuk kanë patur mundësinë t’a ndjekin ekipin e tyre të zemrës nga afër.

Një nga këta tifozë është edhe deputeti Erion Braçe, që njihet si një tifoz i zjarrtë i Partizanit. Pas kërkesës së drejtuesve të “demave” ndaj atyre të Tiranës për t’i lejuar të luajnë në “Selman Stërmasi”, që deri më tani është refuzuar, Braçe po mendon për një tentative të fundit.

Deputeti i ka bërë një thirrje kryetarit të bashkisë, Erion Veliajt, që të bëjë diçka për këtë çështje. Kur bëhet fjalë për stadiumin “Selman Stërmasi” gjërat janë pak sa të ndërlikuara, pasi stadiumi është marrë në konçension nga ekipi i Tiranës, por është në zotërim të Bashkisë së Tiranës.

Nuk dihet nëse Veliaj mund të bëjë diçka për këtë fakt, por Braçe shpreson që po, për t’i dhënë “guerrilsave” atë që ju ka munguar më së shumti këtë sezon, të mbështesin në qytetin e tyre ekipin e zemrës.

Kjo është thirrja e Braçes e postuar dje në rrjetet sociale
Erjon, ooo Erjon!!
Jemi ekip i kryeqytetit, i Tiranes,
paguajme taksa ne Tirane;
Duam te luajme, kendojme e gezojme,
fitojme ketu ne Tirane!! Dhe mos harro;
NE, PARTIZANI KTHEJME TITULLIN NE TIRANE!!
E do apo jo?

/BW