Celibashi: Propozimi i PD për të votuar emigrantët pa dokument identifikimi shqiptar, nuk e mundëson sistemi

Komisioni Qendror i Zgjedhjeve nuk i ka sot kapacitetet për të mundësuar regjistrimin e emigrantëve që nuk kanë një dokument identifikimi shqiptar.

Komisioneri Shtetëror i Zgjedhjeve, Ilirjan Celibashi tha në një konferencë për shtyp se nëse do të pranohet propozimi i PD-së, do të duhet një tjetër sistem që të regjistrojë emigrantët.

“PER është ndërtuar për të identifikuar dokumentet e identifikimit të lëshuara nga Republika e Shqipërisë. Nëse palët bien dakord që identifikimi mund të bëhet edhe përmes dokumenteve të tjera, do të duhet të bëhet një sistem tjetër ose të zhvillohet ky sistem. Nuk më takon të komentoj propozimet që partitë kanë në lidhje me ndryshime të mundshme të kodit, por nëse bien dakord ato, ne kemi detyrimin për t’i zbatuar ”, tha Celibashi.

Më tej, Celibashi bëri të ditur se i ka kërkuar Kuvendit që të miratojë buxhetin për fushatën zgjedhore.

“I kemi kërkuar Kuvendit që sa më parë të miratojë buxhetin për partitë politike të cilat do të marrin pjesë në zgjedhje. Me siguri ky buxhet do tu vihet në dispozicion subjekteve zgjedhore më para fushatës, pasi ky buxhet u është vënë në dispozicion në zgjedhjet e mëparshme shumë pak ditë para nisjes së fushatës ose në ndonjë rast edhe kur fushata kishte filluar”, tha Celibashi.