”Dimri më i ftohtë i shekullit”, Presidenti Biden shpall emergjencën për New York-un

Amerika është përfshirë nga një ”ciklon bombë”, që po ngrin gjithçka. 28 persona kanë humbur jetën në Nju Jork, pjesa më e madhe në qytetin Buffalo. Një zyrtar shtetëror amerikan, thotë se njerëzit mbetën të bllokuar në automjetet e tyre për më shumë se dy ditë, gjatë stuhisë dimërore më të tmerrshme të jetës së tyre.

Sinoptikanët paralajmërojnë për sasi të mëdha dëbore që priten gjatë orëve në vijim. Stuhia, që shtrihet nga Kanadaja deri në Meksikë, ka vrarë mbi 60 persona në total. Presidenti amerikan, Joe Biden, shpalli gjendjen e emergjencës për të mundësuar mbështetje federale për shtetin e Nju Jorkut.

Guvernatorja Kathy Hochul, me prejardhje nga Buffalo, e përshkruan stuhinë si dimri më i ftohtë i shekullit. “Është si të shkosh në një zonë lufte. Të shohësh automjetet të ngecura në rrugë është shokuese”, u shpreh guvernatorja e Nju Jorkut.

Ajo shtoi se ekipet e emergjencës e kanë tepër të vështirë të arrijnë në zonat e goditura rëndë nga stuhia polare dimërore, pasi automjetet e tyre kanë ngecur në akull ose borë.