Donald Lu përshëndetet me Lulzim Bashën, i shkon në zyrë

Ambasadori amerikan Donald Lu ka takuar kreun e PD-së, Lulzim Basha, në zyrën e këtij të fundit në selinë e kësaj partie.

Ambasadori Lu ka përfunduar mandatin e tij në Shqipëri dhe po zhvillon ato që quhen takimet e lamtumirës me liderët politikë shqiptarë.

Lu është takuar më parë me ish-Kryeministrin Sali Berisha, Presidentin Ilir Meta, Kryetaren e LSI, Monika Kryemadhi.

Mbrëmjen e djeshme, ambasadori amerikan e ka cilësuar si propozim interesant vetingun e politikanëve dhe ndoshta në takimin e sotëm me Bashën mund të mësojë detaje mbi projektin e paraqitur nga demokratët.

“Mendoj se ka edhe një tjetër formë vetingu që kemi në demokraci. Ju votoni çdo dy vjet, unë votoj çdo dy vjet si amerikan dhe u kërkojmë llogari zyrtarëve tanë të zgjedhur. Ky është një formë vetingu. Opozita ka vënë në tavolinë një propozim që e konsideroj interesant. Në Amerikë kemi shprehjen, “djalli qëndron tek hollësitë,” dhe po studiojmë hollësitë e propozimit të tyre tani dhe Kryeministri juaj Edi Rama ka thënë tashmë se ai dhe Partia Socialiste janë gati tani të fillojnë negociatat mbi bazën e propozimit të tyre. Le të shohim se çfarë janë në gjendje të arrijnë ato negociata”- tha ai, pyetur per nismen e Bashes.