Sekretari i Përgjithshëm i PD, Flamur Noka, gjatë një takimi me emigrantë në Athinë, Greqi, tha se “Programi i PD-së është shpëtimi për Shqipërinë dhe shqiptarët dhe parashikon 5 vite pa taksa për çdo emigrant që kthehet dhe investon në Shqipëri”.
Ai i falënderoi ata për kontributin e përditshëm që japin për Shqipërinë me remitancat që sjellin për familjet e tyre, që i japin frymë ekonomisë së vendit.
Noka bëri thirrje që emigratët shqiptarë të votojnë për ndryshimin e Shqipërisë, ndërsa u ka bërë thirrje që të regjistrohen për zgjedhjet e 11 majit.
“Ne duam që çdonjëri në Shqipërinë e pas 11 majit të bëjë detyrat që i takojnë dhe shteti mbi të gjitha të jetë shërbëtori i qytetarëve, interesave dhe problematikave që ata i shoqërojnë. Ne duam që ju të punoni për veten tuaj dhe jo të harxhoni gjysmën e të ardhurave tuaja për të mbajtur familjet tuaja në Shqipëri, barrë dhe detyrë që e ka qeveria dhe pushteti”, tha Noka.
“Ju me votën tuaj do të bëni të mundur kthesën, që Shqipëria të ngrihet, të vazhdojë dhe të rikthehet në rrugën e saj Europiane të ndërprerë nga banda në pushtet. Angazhimi i forcës tonë politike në një program të qartë për shqiptarët, përfundimisht do ta zhdukë mjerimin ndër shqiptarë në 100 ditët e para të qeverisjes”, theksoi Noka.
Sipas tij, Programi PD-së do ti japë zgjidhje, plagëve të krimit dhe korrupsionit ku është zhytur Shqipëria.
“Ne do të ofrojmë zgjidhje për pensionistët. Shteti i pas 11 majit do ti sigurojë pensionistëve një pension minimal 220 euro. Do ti sigurojë mundësitë e shërbimit dhe mjekimit, sepse e meritojnë, se pensionistët kanë kontribuar një jetë për vendin tonë dhe nuk meritojnë të trajtohen siç i trajton kreu i qeverisë. 220 euro pensioni minimal në 100 ditët e para të qeverisjes tonë. Shqipëria do të ketë për herë të parë minimum jetik të vendos me ligji, 200 euro.Nuk do të ketë në Shqipëri rrogë nën 500 euro. Këto janë hapat e parë që do të ndërmarrë PD për të luftuar mjerimin, varfërinë dhe për të rimëkëmbur shoqërinë shqiptare”, deklaroi Noka.
Ai tha se, edhe për emigrantët, Partia Demokratike ka një program të qartë.
“Kushdo që do të kthehet në atdhe, dhe të investojë për 5 vite do të ketë zero taksa. Kushdo që do të kthehet në Shqipëri, do ti mundësohet një kredi e butë për zero interes që çdokush që kthehet të ketë mundësi të blejë një shtëpi, si çdo shqiptar atje”, u shpreh Noka.