Koalicionet nuk preken, Paloka: PD pjesë e këshillit, nuk lejojmë prishjen e marrëveshjes së 5 qershorit

Partia Demokratike, do të rikthehet në Këshillin Politik për të diskutuar për reformën zgjedhore.

Nënkryetari demokrat Edi Paloka, tha se opozita jashtë parlamentare mund të japë konsensus për hapjen e pjesshme të listave, por kurrë nuk do të pranojë heqjen e koalicioneve.

Këshilli Politik, pritet të riaktivizohet gjatë muajit shtator, ndërsa opozita jashtë parlmentare do të jetë prezente për t’i kujtuar socialistëve se marrëveshja e 5 qershorit duhet të qëndrojë e paprekur.

Nënkryetari i Partisë Demokratike Edi Paloka, tha se opozita mund të pranojë diskutimin për listat e hapura, por kurrsesi nuk mund të pranojë prekjen e koalicioneve.

“Në marrëveshjen e 5 qershorit është më se e qartë se koalicionet zgjedhore qëndrojnë në formën që janë dhe sot në kodin zgjedhor. Nëse kjo pikë preket atëherë është prishur marrëveshja”, u shpreh Edi Paloka.

Nënkryetari i PD-së tha se Partia Demokratike është e hapur të shkojë edhe tek propozimi i socialistëve për hapje të pjesshme të listave.

“Kemi propozuar hapjen 100 përqind megjithatë jemi të hapur për të biseduar për këtë çështje”, u shpreh Paloka.

Ndërkohë në selinë blu vazhdon procesi i filtrimit të kandidatëve për deputet dhe kryetar bashkishë.

Edi Paloka, tha se paralelisht me ketë proces deri në mesin e muajit, PD do të ketë gati edhe emrat e drejtuesve politikë në qarqe.

“Është një proces që mbyllet brenda mesit të shtatorit dhe në bazë të rezultatit do të ecim dhe me pjesën tjetër të fillimit të fushatës zgjedhore”, u shpreh Edi Paloka.

Nënkryetari demokrat është i sigurt në rezultat pozitiv në zgjedhjet e ardhshme, ndërsa tha se emrat që Rama delegoi një ditë më parë janë dëshmi se Partia Socialiste nuk shkëputet dot nga abuzuesit.