Komisioneri për Zgjerimin, Varhelyi: BE duhet ta marrë shumë seriozisht integrimin e Shqipërisë dhe Maqedonisë së Veriut

Komisioneri i Zgjerimit të Bashkimit Evropian, Oliver Varhelyi, gjatë fjalës së mbajtur në takimin e “Open Balkan” që po zhvillohet në Tiranë, shprehu mbështetjen ndaj kësaj nisme dhe ftoi tre vendet e tjera të Ballkanit Perëndimor të bëhen pjesë e kësaj nisme.

Mes të tjerash, komisioneri Varhelyi deklaroi se e kupton dëshpërimin e kryeministrit maqedonas, ndërsa shtoi se BE duhet ta marrë shumë seriozisht këtë proces, pasi ka ardhur koha që të zhvillohet Konferenca e Parë Ndërqeveritare e BE-së me Shqipërinë dhe Maqedoninë e Veriut.

“E kuptoj dëshpërimin e Zaev, por mos harroni që ne kemi bërë progres në procesin e zgjerimit, kemi hapur kapituj me Serbinë. Megjithatë nuk e fsheh keqardhjen time që ende nuk e kemi mbajtur Konferencën e Parë Ndërqeveritare me Shqipërinë dhe Maqedoninë e Veriut dhe duhet t’i mbajmë shumë shpejt. Kemi një angazhim nga ana e BE, që kjo gjë të ndodhë. Duhet marrë shumë seriozisht dhe ka ardhur koha që kjo të ndodhë, e t’i sjellin në tryezë të gjitha marrëveshjet”, u shpreh Varhelyi.