Në 105-vjetorin e Tiranës si kryeqytet, në Pallatin e Brigadave, u organizua një aktivitet, ku ishte edhe kryeministri Rama. Ai foli ashpër ndaj prokurorit të dosjes së Erion Veliajt. Kryeministri akuzoi se është një turp-hetim dhe se SPAK po del nga shinat kushtetuese.
Edi Rama theksoi se “po zhvillohet një linçim publik dhe pastaj bëhet një heqja nga shpatullat e kokës së kryeqytetit tre muaj para zgjedhjeve”. Me tej kryeministri nënvizoi se “mos po kthehemi në Repubklikë prokurorësh?!”.
Duke folur për aktakuzat, Rama u shpreh se prezumimi i pafajësisë duhet të vihet në vend nga gjykatësi, dhe jo të përdoret për të rënduar pozitat e individëve pa një vendim gjykate.
“Dyshimi i arsyeshëm është që ky veprim është jashtë shinave kushtetuese të Republikës së Shqipërisë. Ne sot, vetëm një idiot mund të na thotë që kontrollojmë drejtësinë. Vetëm një i pafytyrë thotë që nuk i kemi dhënë drejtësinë gjithë pavarësinë që nuk e ka pasur që nga shpallja e pavarësisë në 1912-ën. Të bindur se kjo është kthesa e vërtetë për Shqipërinë dhe fëmijët tanë nesër, që askush të mos jetë mbi ligjin, sot konstatojmë se jemi përballë një sfide tjetër. Pavarësia e arritur duhet të garantojë dhe të garantohet nga profesionalizmi dhe standardet demokratike për garancitë dhe liritë e të drejtat e kujtdo. Prezumimi i pafajësisë nuk thuhet sa për të larë gojën në fund të një aktakuze thuajse 400 faqe, ku flitet deri për persona që nuk kanë shfaqur pendesë. Çfare prezumimi pafajësie njeh ti kur thua se personi që po akuzoj nuk ka shfaqur pendesë. Ku jemi këtu?!
Nivelin e pendesës e gjykon vetëm gjykatësi. Nuk ka pendesë që mund të bëhet shkak për të rënduar pozitën e personit nga ai që e akuzon. Kjo ka ndodhur, por në një kohë tjetër, kur hetimet bëheshin me direktiva nga Sigurimi i Shtetit.
Jemi në një situatë delikate, jo për ne në aspektin politik, jo në aspektin e raportit tonë me drejtësinë. Nuk më takon mua dhe ne dhe nuk do dëgjohet që Erioni është apo jo i fajshëm, kjo është e drejtësisë. Por ne duhet të ngrejmë shumë pikëpyetje jo vetëm për këtë rast, por për shumë raste të tjera në vijim, duke e mbështetur drejtësinë, por duke kërkuar të drejta. Kam takuar artistë që nga ky prokuror iu është presion fashist”, u shpreh Rama.
Me tej kryeministri Rama theksoi se nisur nga ky rast na bën të mendohemi si mazhorancë për sistemin e drejtësisë, duke lenë të nënkuptohet se do rishikojnë funksionimin e këtyre institucioneve.