Kush e merr mandatin e Tahirit? Deputet vjen…(LISTA)

Pasi ish-ministri i Brendshëm, Saimir Tahiri dha dorëheqjen si deputet edhe pse i pavarur, pritet që PS-së ti shohet një deputet. Tahiri e fitoi mandatin në zgjedhjet e 25 qershorit si pjesë e listës së PS-së, por kjo forcë e largoi nga grupi parlamentar fill pas hetimeve nga Prokuroria e Katanjës.

Në listën shumëemërore të PS-së, për zgjedhjet e 25 qershorit, në qarkun e Tiranës pas Saimir Tahirit, vjen ish-deputeti i LSI-së, Spartak Braho dhe kreu i FRESSH, Eljo Hysko. Nuk dihet nëse Braho do ta pranojë të marrë mandatin e deputetit, apo PS-së do ti shtohet një deputet i ri, siç është kreu i FRESSH, Eljo Hysko.

Në konferencën për shtyp të mbajtur tek selia e Kuvendit, Tahiri dorëzoi mandatin e deputetit, duke thënë se: ”Kam marrë një vendim për ta treguar edhe njëherë se nuk jam raca e atyre që rrinë në parlament, për pazar apo për shpëtim. Deri kur të zbardhet e vërteta e plotë, unë nuk do të jem deputet, por qytetar i thjeshtë”.

Tahiri ju drejtua organeve hetuese, se nga sot e kanë si qytetar të thjeshtë, një thirrje kjo që paraprin ndalimin e tij nga Prokuroria e Krimeve të Rënda. ”E si qytetar i thjeshtë me të drejtën time, me familjen e miqtë e mirë dhe me të gjithë ata që më besojnë ende, unë do të përballem me prokurorinë, me drejtësinë, me ligjin, siç do të përballem me palaçot në politike”.

R.SH