LIVE/Përshkallëzohet protesta: Lironi kuksianët, arrestoni Tahirin

Gjykata e Apelit në Shkodër, ka nisur seancën për shqyrtimin e masës së sigurisë për 23 protestuesit në ”Rrugën e Kombit”. Mësohet se policia ka marrë masa të forta sigurie për mbarëvajtjen normale të kësaj seance.

Siç shihet në video, qindra qytetarë dhe deputetë po protestojnë duke kërkuar lirimin e 11 kuksianëve, ku me pankarta në duar në të cilat shkruhet: ”Lironi kuksianët, arrestoni Tahirin”.  Protestuesit kanë ndezur edhe tymuese pranë gjykatës, megjithatë deri tani situata mbetet e qetë, në pritje të dhënies së masës.

Kryetari i Grupit të PD-së, Edmond Spaho, së bashku me kolegët e tij deputetë ndodhen para Gjykatës së Apelit në Shkodër, ku po zhvillohet seanca gjyqësore për 11 protestuesit e arrestuar në Kukës.

I pyetur nga mediat nëse PD-ja ishte duke i bërë presion drejtësisë, me këtë angazhim të deputetëve para gjykatës, Spaho tha: ”Seancat janë publike dhe ne e kemi shprehur hapur mbështetjen tonë për këta njerëz, mbështetje në përputhje me ligjin dhe sistemin gjyqësor”.