Meta refuzon ofertën e Berishës, del kandidat për deputet në Tiranë

Presidenti i Partisë së Lirisë, Ilir Meta ka refuzuar ofertën e Berishës për të qenë në listën e mbyllur. Ai do të jetë në listat e hapura si kandidat për deputet në qarkun e Tiranës, në zgjedhjet parlamentare të 11 majit. Ky ishte vendimi i Metës, i cili u miratua sonte edhe nga Kryesia e Partisë së Lirisë. Berisha i ofroi mandat të sigurtë për në listën e Fierit.

“Kryesia e Partisë së Lirisë miratoi sonte vendimin e Presidentit të Partisë së Lirisë, Z. Ilir Meta për të qenë kandidat për deputet në listën e hapur, Qarku Tiranë, të koalicionit “Partia Demokratike-Aleanca për Shqipërinë Madhështore”, në zgjedhjet për Kuvend të datës 11 Maj 2025”,- thuhet në njoftimin e zyrës së shtypit të Partisë së Lirisë.

Sipas marrëveshjes, PL do të ketë 4 mandate në listë të sigurtë, ndërsa Meta shprehu ambicien për dyfishimin e grupit parlamentar në parlamentin ardhshëm. Meta u kërkoi anëtarëve të Komitetit Drejtues Kombëtar të forcojnë bashkëpunimin me aleatët me qëllim që koalicioni me 26 parti të fitojë.