Ministri Balla: Ndal zjarrëvnies, 17 persona u ndaluan brenda një muaji

Brenda një muaji janë proceduar 17 persona për zjarrvënie, një fenomen që vijon të mbetet shqetësues sidomos në muajt e verës kur temperaturat rriten dhe rreziku i flakëve e pasojat që sjell, shtohen.

Ministri i Brendshëm Taulant Balla ka reaguar pas arrestimit të një të riu në jug të vendit, i dyshuar për zjarrvënie dje pasdite.

“Policia e Shtetit po identifikon në shumë raste autorët e zjarreve, të cilat kanë shkaktuar dëme të mëdha në pyje dhe kullota, por që kanë rrezikuar jetën dhe banesat e banorëve. Përgëzime Policisë së Shtetit Gjirokastër për identifikimin dhe ndalimin në flagrancë të autorit të dyshuar të zjarrvënies në Frashtan. Policia e Shtetit ka ndaluar/proceduar 17 persona gjatë muajit të fundit për vepra penale që lidhen me zjarrvënien. NDAL ZJARRVËNIES”, shkruan Balla në rrjetet sociale.