Ministri i Drejtësisë Nasip Naço jep dorëheqjen, pas takimit me Ramën

Ministri i Drejtësisë Nasip Naço ka dhënë sot dorëheqjen e papritur dhe nuk dihen arsyet e këtij vendimi, ndonëse prej kohësh është folur për ndryshime në kabinetin qeveritar.

Zyrtarisht është thënë se nuk do ketë ndryshme, por prej kohësh kreu i LSI-së, Ilir Meta qe shprehur për impulse të reja në qeverisjen e vendit, duke lënë të nënkuptohet se do të kishte ndryshime.

Dorëheqja e ministrit ka ardhur pikërisht pasi Naço ka bërë një takim me kryeministrin Rama.

Nasip Naço është futur në politikë në vitet 2008 – 2009, ku ka qenë Sekretar Politik i LSI-së, për Qarkun e Beratit. Në legjislaturën XVIII, zgjidhet deputet i Qarkut te Beratit, për Grupin Parlamentar të LSI-së, dhe në periudhën 2009 – 2011, ushtron detyrën e Zëvendëskryetarit të Kuvendit të Shqipërisë.

Në vitet 2011 – 2012, ai ushtron detyrën e Ministrit të Ekonomisë, Tregtisë dhe Energjetikës. Më pas rizgjidhet Zëvendëskryetar i Kuvendit të Shqipërisë në Korrik 2012, dhe në qeverisjen e majtë gjatë dy viteve të fundit zgjidhet Ministër i Drejtësisë.

Pas dorëheqjes së tij, nëse kjo i është imponuar për shkak të Reformës në Drejtësi, apo lëvizje politike për ndryshime në qeveri, mbetet që të sqarohet pas largimit të Naços.