Ministri i Financave, Petrit Malaj, përmes një postimi në rrjetet sociale, vuri në dukje rëndësinë e rimbursimit të TVSH-së.
Gjatë një vizite në kompaninë “Luna shpk” në Dushk, e cila operon në sektorin e përpunimit aktiv të këpucëve për tregun italian, ai theksoi se ky mekanizëm ndihmon bizneset të sigurojnë likuiditet dhe të përmbushin kërkesat e klientëve në kohë. Ministri diskutoi gjithashtu mbi sfidat dhe nevojën për fuqi punëtore të kualifikuar.
“Me Hënën, administratoren plot energji të kompanisë Luna shpk, që operon në sektorin e përpunimit aktiv të këpucëve për tregun italian”, shkruan Malaj.
“Me shumë vite përvojë ajo ka të punësuar rreth 90 punonjës, duke kontribuar kështu në zhvillimin e zonës. Biseduam rreth mënyrave sesi mund të kapërcehen sfidat, por edhe për gjetjen e krahut të kualifikuar të punës”, vijoi ministri i Financave.
“Rimbursimi në kohë i TVSH-së i ka dhënë mundësi të ketë likuiditet dhe të plotësojë në kohë kërkesat e klientëve”, përfundoi Malaj. ATSH