Paloka publikon pamjet: Qeveria dhe Bashkia përgjegjëse për përmbytjet në Shijak

Në cilësinë e drejtuesit politik të PD-së, në Durrës, nënkryetari i Partisë Demokratike Edi Paloka denoncon situatën e rëndë të krijuar nga reshjet e dendura të shiut në zonën e Shijakut.

Gjatë një takimi me banorët e zonës së përmbytur prej ditësh nga uji, Paloka tha se Qeveria dhe Bashkia janë përgjegjëse për përmbytjet në Shijak, duke shtuar se “Rilindasit” e udhëhequr nga Edi Rama mendojnë për xhepat e tyre, e jo për qytetarët.

“Një situatë e vështirë si pasojë e përmbytjeve edhe në Shijak! Si për ironi, pikërisht përballë godinës së bashkisë dhe rrotull saj janë dhjetëra banesa që ju ka vajtur uji edhe mbi një metër në shtëpia e biznese. Edhe këtu banorët e drejtojnë gishtin nga pushtetarët, që jo vetëm janë direkt përgjegjës për këtë situatë që ka filluar vitet e fundit, po as nuk pranojnë të ndihmojnë e dëmshpërblejnë bizneset dhe familjet që kanë pësuar dëme të mëdha.

Vetë bashkia është përgjegjëse direkt për përmbytjet në këtë zonë, pasi, siç thonë banorët, ka mbushur me inerte lumin Erzen pikërisht tek këmbët e urës në hyrje të qytetit, për të ndërtuar parkim për makinat e zyrtarëve të bashkisë…!

Si kudo, “rilindasit” kujdesen vetëm çfarë do fusin në xhepat e tyre, po nuk ju hyn fare në xhep nëse qytetarët kanë probleme apo jo”, shprehet nënkryetari i PD-së, Edi Paloka.