Presidenti Meta lë një mesazh në dedikimin prekës të bashkëshortit të Hueyda el Saied

Presidenti i Republikës, Ilir Meta, ka lënë me një mesazh ngushëllimi për artisten Hueyda El Saied, e cila u nda nga jeta pak ditë më parë në moshën 46-vjeçare.

Në postimin e dedikimit prekës të bashkëshortit të artistes, Thierry Grosjean, Presidenti Meta shkruan se Hueyda do të kujtohet gjithmonë si simbol i mirësisë dhe suksesit, artiste e jashtëzakonshme, me kurajë, guxim të rrallë dhe sharm të mahnitshëm.

Mesazhi i Presidentit Meta
Të dashur Gabriel dhe Thierry,
Humbja e parakohshme e Hueydas tuaj të shtrenjtë dhe shumë të dashur për ne, na lëndoi të gjithëve.
E lexova me shumë emocion dedikimin tuaj prekës dhe më lejoni të ndaj me ju dhembjen e madhe, t’ju shpreh ngushëllimet më të ndjera, por edhe solidaritetin për gjithçka shprehni me fjalë zemre.
Hueyda do të kujtohet gjithmonë si simbol i mirësisë dhe suksesit, artiste e jashtëzakonshme, me kurajë, guxim të rrallë dhe sharm të mahnitshëm, e cila me arritjet e saj fitoi simpatinë dhe respektin e të gjithë shqiptarëve, duke u shndërruar në një model të përhershëm frymëzimi dhe referimi për të rinjtë.
Do ta duam dhe do ta respektojmë gjithmonë kujtimin dhe trashëgiminë artistike të saj!