Presidenti Meta në Skrapar: Shpresoj çeljen e negociatave në qershor, të punojmë të bashkuar

Presidenti i Republikës, Ilir Meta, ndodhet në një vizitë në Bashkinë e Çorovodës, nga ku u pritet nga kryetari i Bashkisë dhe qindra banorë, për ceremoninë e hapjes së sezonit turistik. Në këtë vizitë në Skrapar, Presidenti Meta shoqërohet nga disa ambasadorë të huaj.

Në kuadër të Ditës së Europës, Presidenti Ilir Meta dha mesazhin që politika të punojë fort, dhe të jetë e bashkuar për të realizuar prioritetet kyçe. Nga Skrapari ai ka uruar ditën e Fitores mbi Fashizmin, duke shprehur besimin për çeljen e negociatave në muajin qershor.

”Skrapari, krahina e parë e Shqipërisë e çliruar nga partizanët. Shpresoj në çeljen e negociatave në muajin qershor. Të punojmë fort e të bashkuar në realizimin e prioriteteve kyçe”, tha Meta.

Kreu i Shtetit, nuk nguroi as të inkurajojë promovimin e kësaj zone, të cilën e cilësoi si pasuri kombëtare unikale dhe me vlera të jashtëzakoshme turistike.

”Kënaqësi që turizmi në Skrapar po zhvillohet me rritje të shpejta. E ardhmja e Skraparit mbështet fort tek turizmi. Të promovojmë bukuritë e zonës. Promovim potencialeve dhe resurseve turistike të zonës, nga vlerat e kulinarisë të ushqimeve bio e deri tek të pakrahasueshmet Kanionet e Osumit, si pasuri kombëtare unikale dhe me vlera të jashtëzakoshme turistike”,-tha në fjalën e tij Kreu i Shtetit.