Presidenti i Republikës, Ilir Meta vizitoi sot Qendrën Shqiptare për Integrimin e Njerëzve me Nevoja të Veçanta, me seli në Elbasan, ku u takua dhe u përshëndet me fëmijët autikë, u interesua për shëndetin dhe nevojat e tyre, si dhe u shpërndau dhurata me rastin e festave të fundvitit.
Në bashkëbisedim me stafin e mësuesve dhe kujdestarëve, Kreu i Shtetit vuri në dukje rëndësinë, që si fëmijët me nevoja të veçanta, ashtu edhe familjet e tyre, të mos ndihen të përkrahur vetëm në prag të ditëve festive, por të mbështeten në mënyrë të përhershme, si nga institucionet shtetërore, ashtu edhe nga shoqëria, veçanërisht në këtë situatë të vështirë shëndetësore, ekonomike dhe sociale, që po kalon vendi ynë për shkak të pandemisë COVID-19.
Gjithashtu, Presidenti Meta theksoi nevojën dhe domosdoshmërinë e integrimit të plotë të tyre në shoqërinë shqiptare.
Në një prononcim për mediat, pas vizitës në Qendrën Shqiptare për Integrimin e Njerëzve me Nevoja të Veçanta, Kreu i Shtetit u shpreh se:
“Ishte kënaqësi të vizitoja sot në Elbasan, këtë Qendër të mrekullueshme të integrimit të fëmijëve, të cilët kanë nevoja të veçanta dhe që të gjithë së bashku duhet t’i ndihmojmë për t’u integruar sa më mirë në familje, në shoqëri dhe në komunitet.
Ishte kënaqësi të shkëmbeja mendime edhe me prindërit e tyre, të cilët janë kontribuesit kryesor për këtë qendër, si dhe me drejtuesit e saj.
Ndamë së bashku shqetësimin dhe angazhimin për t’i kushtuar edhe më shumë vëmendje përmirësimit të legjislacionit në ndihmë të këtyre fëmijëve, të cilët kanë nevojë për shërbime të veçanta, sigurisht, edhe për një mbështetje më të gjerë nga të gjithë institucionet shtetërore, publike, dhe sipërmarrja private, me qëllim nxitjen e një ndjenje më të fortë të solidaritetit dhe vullnetarizmit, në mënyrë që edhe këta fëmijë, të ndihen sa më të integruar në familjet dhe në shoqërinë tonë, si dhe të kenë mundësi të jenë sa më të pavarur në jetë.
Me këtë rast ju uroj Gëzuar Krishtlindjen dhe Vitin e Ri edhe të gjithë fëmijëve të Shqipërisë”, – u shpreh Presidenti Meta.
