PS del e dyta në Shokdër, Gjiknuri: Qyteti do të jetë në qendër të vëmendjes së qeverisë

Sekretari i Përgjithshëm i PS, Damian Gjiknuri ka falënderuar banorët e Shkodrës për votën e dhënë për PS dhe për kandidatin e saj, Majlinda Angoni në zgjedhjet e pjesshme lokale që u mbajtën të dielën. Përmes një postimi në rrjete sociale, Gjiknuri siguron se pavarësisht votës më 6 mars, Shkodra do të vazhdojë të jetë në qendër të vëmendjes së qeverisë dhe Kryeministrit Rama.

“Faleminderit çdo banori të Bashkisë së Shkodrës për votën e dhënë për Partinë Socialiste dhe kandidaten e saj! Respekt për Majlinda Angonin, për betejën e saj dinjitoze dhe qytetare!

Garanci për çdokënd që votoi apo nuk votoi për Partinë Socialiste se Shkodra do të vazhdojë të jetë në qendër të vëmendjes së qeverisë dhe Kryeministrit Rama.

Më shumë punë e reflektim, pas 1 viti do mund të bindim edhe ata që nuk na votuan dhe do të meritojmë drejtimin e punëve edhe në Bashkinë e Shkodrës”, thekson Gjiknuri.