Kryeministri Edi Rama deklaroi se debatet rreth projektit në zonën e Zvërnecit dhe shqetësimet ne protestë për flamingot duhet të mbështeten në fakte dhe jo në, siç u shpreh ai, manipulime apo interpretime të pasakta.
I pranishëm në eventin e 35-vjetorit të PS-së në Elbasan, Rama theksoi se mbrojtja e natyrës nuk duhet të përdoret për qëllime politike dhe se diskutimi duhet të jetë i bazuar në të vërteta të verifikueshme.
“Nëse ti je i shqetësuar për flamingot dhe natyrën, ti je i pari që duhet t’i bësh jehonë të vërtetave, jo manipulimeve. Ti duhet të jesh i pari që duhet të verifikosh të vërtetën mbi bazën e fakteve dhe jo të thuash duam dorëheqjen. Çfarë dorëheqje? Dorëheqjen nga misioni i PS për të anëtarësuar Shqipërinë në BE? Kush do shkojë ta përfaqësojë Shqipërinë atje për të negociuar me BE? Kush do i dalë për zot Shqipërisë? Ata që mendojnë se mjafton të vishesh si flamingo dhe je seksi dhe do të vijnë të tjerët nga pas? Ne nuk jemi tradhtarë, por shpëtimtarë të një vendi ku flamengon vriteshin me çifte për qejf”, tha Rama.
Ai shtoi se Shqipëria ndodhet në një moment historik dhe se procesi i integrimit europian kërkon përgjegjësi.
“Shtëpia e shqiptarit është e Zotit dhe e mikut. Shtëpia është e hapur për të gjithë. Shqipëria është e shqiptarëve të kujton atë sloganin e Gjermanisë Naziste. Me atë slogan ata e bënë Gjermaninë delen e zezë të botës. Ai është racizëm, verbëri dhe thikë pas shpine, për të gjithë ata që Shqipërisë i kanë dhënë medaljen e artë në luftën e dytë botërore. Në radhë të parë myslimanët, pastaj edhe të krishterët, që u bënë shpëtimtarët e hebrenjve dhe e bënë Shqipërinë të vetmin vend që nuk u dorëzua asnjë hebre. Ndërkohë që në gjithë Europën i merrnin hebrenjtë dhe i shisnin nga frika, ndërkohë që në Shqipëri vunë veten në rrezik, për të mbrojtur hebrenjtë. Në një kohë që kombi shqiptar është në një moment po aq historik sa Lidhja e Prizrenit, siç është futja në BE, këto janë marrëzira që shkojnë në drejtim të gabuar me sensin e historisë”, deklaroi Rama gjatë fjalës së tij.
ATSH