Rama i kënaqur me mbledhjen e Këshillit të Sigurisë nga Presidenti Meta, lavdëron edhe Bashën

Kryeministri Edi Rama e ka vlerësuar me nota shumë pozitive, si asnjëherë tjetër, mbledhjen e sotme të Këshillit të Sigurisë Kombëtare, të thirrur nga Presidenti i Republikës, Ilir Meta.

Kryeministri shprehet se ka shkëmbyer mendime me kreun e shtetit Ilir Meta dhe kreun e opozitës, Lulzim Basha. Rama. Rama shton se sikur komunikimi publik të ishte kaq pozitiv, sa në mbledhjen e Këshillit të Sigurisë, politika do të ishte shumë më ndryshe.

“Mbledhje e gjatë por e dobishme e Këshillit të Sigurisë Kombëtare dhe një shkëmbim i hapur opinionesh me Presidentin e Republikës & kryetarin e PD për hapjen graduale të aktivitetit në javët në vijim! Sikur komunikimi publik të ishte kaq pozitiv, politika do ishte shumë ndryshe”,– shkruan Rama në një postim në Twitter.

Ditën e sotme Presidentit të Republikës, Ilir Meta thirri mbledhjen e Këshillit të Sigurisë Kombëtare. Takimi i krerëve të shtetit u zhvillua nëpërmjet një video-konference dhe kishte në qendër të diskutimeve situatën që po kalon vendi nga përhapja e pandemisë globale COVID-19.

Në këtë mbledhje morën pjesë Kryetari i Kuvendit, Gramoz Ruçi, Kryeministri Edi Rama, ministrat përgjegjës, si edhe Kryetari i Partisë Demokratike, Lulzim Basha.

Presidenca njofton se çështjet kryesore që u diskutuan ishin vlerësimi mbi situatën aktuale të pandemisë, masat që po ndërmerren për përballimin e pasojave ekonomike dhe sociale, zhvillimi i procesit arsimor dhe strategjia e planifikuar për përfundimin e vitit akademik 2019-2020, si dhe ndryshimet e propozuara në Kodin Penal.

Kryeministri Rama dhe ministrat përgjegjës informuan për masat e marra për përballimin e krizës shëndetësore dhe social-ekonomike, si dhe për menaxhimin e mëtejshëm të situatës. Kryetari i Kuvendit Ruçi shprehu angazhimin për përmbushjen e detyrimeve të Kuvendit në këtë situatë.

Kryetari i Partisë Demokratike Basha shprehu pikëpamjet dhe sugjerimet e opozitës për ta tejkaluar këtë pandemi me pasoja sa më të lehta për qytetarët dhe ekonominë e vendit.

Presidenti Meta vlerësoi rëndësinë e rritjes të efikasitetit të masave, përmes ndërgjegjësimit, transparencës, gjithëpërfshirjes dhe rritjes së frymës së bashkëpunimit, pasi objektivi madhor i përbashkët është mbrojtja e shëndetit të qytetarëve, i ekonomisë kombëtare, si dhe përmbyllja e vitit shkollor.