Rama: Memoriali Spital Solar, një tjetër investim i rëndësishëm në fushën e energjisë së rinovueshme

Diversifikimi i burimeve të prodhimit të energjisë edhe në shërbimin spitalor synon rritjen e sigurisë energjetike. Kryeministri Edi Rama ka postuar pamje nga Spitali Memorial në Fier, ku po kryhet një investim i rëndësishëm në fushën e energjisë së rinovueshme.

”Memoriali Spital Solar, një tjetër investim i rëndësishëm në fushën e energjisë së rinovueshme. Panelet diellore, me një prodhim vjetor prej 180 MWh, do të sigurojnë kursimin e energjisë elektrike deri në 25%”, u shpreh Rama. Kreu i qeverisë shton edhe se diversifikimi i burimeve të prodhimit të energjisë, edhe në shërbimin spitalor, rrit sigurinë energjetike, drejt objektivit për ta bërë shërbimin shëndetësor përdorues të energjisë solare.

Energjia diellore në vendin tonë ka arritur në 10% të prodhimit të përgjithshëm të energjisë, ndërkohë që diversifikimi i burimeve energjetike është shpallur prioritet me synimin që vendi të arrijë sovranitetin në këtë sektor e të jetë eksportues neto.