Rama mban ”premtimin”, shkarkon dy drejtorë

Në Asamblenë e PS-së, kryeministri Edi Rama foli për shkarkime. Ai u kërkoi ministrave, deputetëve dhe përfaqësuesve të tjerë të partisë, që të jenë më pranë qytetarëve dhe të angazhohen më shumë. “Qytetarët nuk hanë shifra”, u shpreh ai ndër të tjera.

Nuk ka vonuar shumë nga ”premtimi”, dhe sot kanë nisur shkarkimet e para. Mësohet se kreu i qeverisë ka thirrur në raportim mujor Drejtorët Rajonalë të Punësimit për matur performancën e tyre në Punësimet përmes Zyrave Shtetërore të Punës.

Mësohet se Rama ka shkarkuar Drejtorin Rajonal të Punësimit në Elbasan, Oltion Kukunja dhe atë të Delvinës, Skënder Qilimi për performancë të dobët dhe mospërmbushje të objektivave të vendosura nga kreu i qeverisë.

Elbasani ka punësuar përmes zyrave vetëm 65 persona që nga 110 që ishte objektivi i punësimit për muajin prill. Me 45 punësime me pak se objektivi. Drejtori i Punësimit në Delvinë, ishte me vetëm tre punësimë nën objektiv, por Rama nuk e ka falur duke e shkarkuar nga detyra.