Kreu i Partisë Demokratike, Sali Berisha, ka shkuar në Prokurorinë e Posaçme për të zbatuar masën “detyrim paraqitje” të caktuar nga Apeli i GJKKO.
Ndërsa simpatizantët e PD-së janë mbledhur para SPAK-ut në mbështetje të kryetarit të tyre.
Ndërkohë vetëm tre ditë më para, Berisha dënoi tubimin para SPAK të qytetareve në mbështetje të Erion Veliajt dhe tha se do të dilte vetë në mbrojtje të institucioneve të drejtësisë. Ndërsa sot, vetë ish-kryeministri ka mbledhur simpatizantët e tij para SPAK-ut.
Gjithashtu, në media qarkullon edhe një mesazh dërguar nga selia blu te drejtuesit e degëve dhe anëtarët më të thjeshtë, ku kërkohet një mobilizim në mbështetje të Sali Berishës.
“Te dashur miq. Ditën e hënë në ora 9:30 sërish, Kryetari i PD Prof. Dr Sali Berisha do jetë në dyert e SKAP-it. Ju lutem të mobilizojmë strukturat e degëve për të qenë të gjithë aty. Në ora 9:30 përpara selisë së SKAP-it. Faleminderit!”, thuhet në mesazh.
Pasi doli nga SPAK, Berisha deklaroi për mediat se ka lënë në SPAK një letër në të cilën, sipas tij ka shkruar se i drejtohet kreut të prokurorisë se politika e Xhorxh Soros ka dështuar në SHBA dhe se e njëjta gjë do të ndodhë edhe në Shqipëri.
“Unë sot do të dënoj me forcën më të madhe aktin puçist, banditesk të narkoqeverisë dhe narkobashkisë Rama, të cilët morën peng për orë të tëra gjykatës dhe prokurorë të çështjes Veliaj. Rikthyen në Tiranë skenat e viteve ’80, kur Eskobari sulmoi gjykatën dhe aty pati viktima të tëra. Pas 40 e sa vitesh, Ediskobari kreu të njëjtin akt ndaj gjykatës dhe prokurorisë.
Në historinë e botës ka pra vetëm dy raste, ka rastin Eskobar dhe rastin Ediskobar. Në historinë e botës ka me qindra raste protestash opozitare apo grupe interesi para gjykatave dhe prokurorive në çdo kryeqytet të botës. Por protestë shtetërore, protestë e organeve shtetërore, kjo përbën një grusht shteti brenda shtetit. Dhe e garantoj Edi Ramën dhe Erion Veliajn se ky krim antikushtetues do u regjistrohet atyre dhe do ndëshkohen në mënyrë shembullore që kujt të mos i shkojë mendja në pushtet të sulmojë pushtetin tjetër”, deklaroi më tej ai.