“KOHA JONË” është e para gazetë e pavarur shqiptare, e cila sot mbush 29 vite nga dita e botimit si media e lirë më 11 maj 1991.
Ishte qyteti i Lezhës djepi i parë i saj e më pas në vitin 1993 ajo u bë tribunë e mendimit oponent shqiptar dhe penave më brilante të gazetarisë, duke hyrë në histori si gazeta që ishte edhe media, edhe shkollë praktike e gazetarisë shqiptare.
29 vite ikën, nga pak e përditë, por KOHA JONË mbetet ikonë e medias së lirë shqiptare, e cila vrau frikën e viteve të para të pas pluralizmit, duke u përballur me pushtetet si asnjë media tjetër.
KOHA JONË nga sot hyri në vitin e 30-vjetorit, festë e cila do të mbledhë krejt gazetarët që kanë punuar në redaksinë e kësaj gazete epokale.
Mjafton të shikosh sot drejtuesit, analistët, komentatorët, gazetarët investigativë apo kryeredaktorët e mediave kryesore dhe publiku e di se ata kanë pas vetes markën MADE IN KOHA JONË!