Tahiri la mandatin, ja kur Prokuroria do kërkojë arrestimin?

Pasi dorëzoi zyrtarisht mandatin e deputetit, ish-ministri i Brendshëm, Saimir Tahiri, u shpreh se do të dalë para ligjt si qytetar i thjeshtë. Sipas burimeve, Prokuroria e Krimeve të Rënda pritet që ta thërrasë për dëshmi javën që vjen.

Tahiri do të pyetet për lëvizjet e tij në Itali dhe Greqi, gjatë viteve 2014-2015. Në të dyja udhëtimet, ai ka përdorur automjetin tip “Audi”, të cilin ua kishte shitur Habilajve, përpara se të emërohej ministër.

Ish-ministri, gjatë kohës që ka qenë në detyrë, ka përdorur “Audin” e famshëm me targa të pandryshuara, në udhëtimet në Greqi dhe Itali. Organi i akuzës do të kërkojë arrestimin e Tahirit, vetëm nëse ka prova të reja që e rëndojnë më shumë pozitën e ish-ministrit.

Tahiri ka rimarrë mbrapsht pasaportën e tij të bllokuar me kërkesë të Prokurorisë, pasi Apeli ka argumentuar se ai nuk rrezikonte të largohej, për shkak edhe të funksionit të deputetit.