Kryeministri Edi Rama ka qenë ditën e sotme në Elbasan për transformimin e Parkut Metalurgjik nga një trashëgimi industriale në një hapësirë të gjelbër. Të pranishëm në këtë aktivitet ishin edhe ministri i Shtetit për Pushtetin Vendor, Arbjan Mazniku, Ministri i Ekonomisë, Blendi Gonxhja si dhe Kryetari i bashkisë Elbasan, Gledian Llatja.
Ministri Mazniku dhe kryebashkiaku Gledian Llatja prezantuan masterplanin që sipas tyre, do ta shndërrojë zonën në epiqendër të inovacionit dhe zhvillimit, “me energji të pastër, prodhim të avancuar dhe teknologji të qëndrueshme”.
Ndërsa kryeministri Edi Rama ftoi bizneset që t’i bashkohen projektit. Sipas tij, ky park do të bashkojë Tiranën dhe Elbasanin dhe në vitet e ardhshme, do ta bëjë Elbasanin pjesë të metropolit të Shqipërisë.
“Qëllimi është të hyjmë në një fazë të re në transformimin e territorit të kombinatit metalurgjik në një park kombëtar industrial, i cili ka një potencial të jashtëzakonshëm dhe për të cilin ne duam të mbështetemi në një aleancë me bizneset që janë këtu. Jo vetëm për zgjerimin tuaj, por edhe për të ndërtuar një koncept të ri në administratën e jetës së përditshme të këtij territori. Ne kemi angazhuar një numër të konsiderueshëm arkitektësh të huaj dhe vendas, ndër më të mirët, për të zbatuar masterplanin.
Këtu territori është i madh dhe ka vend për të imagjinuar shumë gjëra. Ideja është që ky park të jetë një destinacion për të gjithë. Ky park do të bëhet së bashku me motoparkun, pika që do të bashkojë Tiranën dhe Elbasanin dhe do ta bëjë Elbasanin pjesë të metropolit të Shqipërisë në dekadat e ardhme. Do të shkurtohen distancat. Që të vish të punosh këtu distanca është po aq ose dhe më e shkurtër se koha nga një anë e Tiranës në tjetrën. Këtu ka potencial për të hapur kryeqytetin, dhe për t’i dhënë një energji të re. Parku i Kombinatit dhe Automotoparku, që nuk është vetëm për Formula 1 që është tre ditë në vit, por do të jetë një destinacion i përditshëm për sigurinë rrugore, sipas modeleve më të mira që ka sot Europa, falë edhe partneritetit me qendrat e sigurisë rrugore në Austri.
Ne duam që kjo rrugë të nisë nga ju, nga planet tuaja, çfarë planesh keni për zgjerimin, cilët prej jush kanë plan të zgjerohen në mënyrë që këto të dhëna t’i përfshijmë në bazën e të dhënave për të kaluar te realizimi i masterplanit. Jo vetëm biznes, por edhe kulturë, edhe sport, edhe argëtim për fëmijët. Shpresoj shumë në këtë bashkëpunim”, tha Rama.