Afron gripi në Shqipëri, tre lloje shfaqen në Europë; ekspertët japin këshilla

Temperaturat e larta kanë ndikuar në mbajtjen larg të sëmundjeve virale siç është gripi, gjatë ditëve të fundit. Sipas buletinit të Organizatës Botërore të Shëndetësisë, qarkullimi i gripit në Europë, aktualisht është në nivele të ulëta.

Nga raportimet e deritanishëm janë vetëm 55 raste të prekura nga viruse gripale në të gjithë Europën. Në vendin tonë ende nuk ka asnjë rast të dyshuar apo të konfirmuar me grip.

Ekspertët e Shëndetësisë Botërore thonë se edhe këtë sezon gripal, pritet që në qarkullim të jenë tre tipe virusesh, A H1N1, A H3N2  dhe B. Këto viruse kanë disa vite që janë në qarkullim në Europë.

Në janar përgjithësisht virusi gripal arrin kulmin e tij, të përhapjes në popullatë.

Më të prekurit nga sëmundjet virale janë të moshuarit, fëmijët, personat që vuajnë nga sëmundje kronike dhe ata me imunitet të dobët.

Specialistët e shëndetësisë, rekomandojnë injektimin e vaksinës për këto kategori.