Capital T, një baba për mijëra fëmijë të prekur nga tërmeti (VIDEO)

Në këtë tragjedi në të cilën po kalon Shqipëria, solidariteti dhe ndihma e treguar nga artistët shqiptarë është e madhe. Njëri prej tyre, reperi i njohur shqiptar, Capital T, ka qenë shumë i angazhuar këto ditë në aksionet humanitare për të ndihmuar të prekurit nga dy tërmetet e fuqishme që goditën Shqipërinë.

Ai ka qenë i pranishëm së fundmi në sallën ”1 Tetori”, aty ku janë dërguar ndihmat materiale nga shqiptarët e Kosovës dhe njëherësh kanë qenë të evakuuar disa banorë nga Durrësi dhe Thumana. Reperi ka publikuar në rrjetet sociale disa imazhe nga zhvillimet gjatë aksioneve humanitare, duke njoftuar ndjekësit e tij për nevojat apo lajmet e rëndësishme lidhur gjendjen aktuale.

Capital T është kujdesur që të jete tejet atraktiv edhe për fëmijët në sallë. Në një video të publikuar në InstaStory, Kapo shihet se si ka argëtuar një fëmijë të vogël aty pranë, teksa po lozte me lodrën e tij për të shmangur vëmendjen nga ngjarja e trishtë. Ky moment emocional ka reflektuar tej mase te ndjekësit e tij në Instagram, të cilët e vlerësuan lartë zemërgjerësinë e reperit.