Ndërron jetë aktori i “Friends”, vuante nga kanceri që prej vitit 2018
Showbiz E Hënë, 25 Tetor 2021 11:08
“Friends”-at humbën një mik të mirë të dielën. Aktori amerikan, James Michael Tyler, i njohur për rolin e Gunther në serialin e famshëm, u nda nga jeta në moshën 59-vjeçare.
“Tyler vdiq paqësisht në shtëpinë e tij në Los Anxhelos, mëngjesin e së dielës. Nëse e takoje një herë, atë e bëje shok për jetë”, thuhej në një deklaratë të menaxherit të tij.
Që prej vitit 2018, aktori vuante nga kanceri në prostatë, që më pas u përhap edhe në kocka. Personazhi i Tyler në serialin “Friends” punonte si kamarier dhe menaxher në kafenenë e frekuentuar nga shokët, në Central Perk.
Ai ishte i dashuruar me Rachel, personazh i interpretuar nga Jennifer Aniston. Të gjithë protagonistët e serialit i bënë homazh 59-vjeçarit në rrjetet sociale.
