Yll Limani lë performancat në klube: Gati për një frymëmarrje tjetër

Yll Limani ka surprizuar publikun me një njoftim të drejtpërdrejtë dhe emocional: në vitin 2026 ai nuk do të mbajë performanca në klube, duke vendosur kështu një pauzë nga një format që ka shoqëruar për vite me radhë rrugëtimin e tij muzikor.

Në një mesazh të publikuar së fundmi, Limani rikujton lidhjen e fortë me publikun dhe netët e panumërta të ndara bashkë në klube të ndryshme, ku muzika e tij ka gjetur njerëz që e kanë ndjerë dhe dashur sinqerisht. Mirënjohja është në qendër të deklaratës së tij, duke e bërë të qartë se ky vendim nuk vjen nga largimi prej muzikës apo nënvlerësimi i skenës së klubeve.

Përkundrazi, artisti thekson se klubet kanë qenë pjesë thelbësore e historisë së tij artistike vendi ku është rritur, ku është njohur me publikun dhe ku janë krijuar kujtime të paharrueshme. Megjithatë, ai pranon se jo çdo këngë dhe jo çdo fazë krijuese i përket të njëjtës hapësirë.

“Disa këngë s’janë t’bome për klube,” shprehet Limani, duke lënë të kuptohet se muzika që po krijon dhe momenti ku ndodhet kërkojnë një dimension tjetër për t’u përjetuar plotësisht. Vendimi për pauzë lidhet drejtpërdrejt me nevojën për kohë, fokus dhe një frymëmarrje të re artistike. Sipas tij, kjo është një ndalesë e domosdoshme për të krijuar hapësirë për diçka më të madhe – për t’u përgatitur, për t’u takuar ndryshe me publikun dhe për të ndërtuar kapitullin e radhës në karrierë.

–